Prije sedam godina, tada malo poznati, 17-godišnji Aleksander Isak u dresu AIK-a postigao je deset golova u Alsvenskan ligi (top divizija Švedske) – nakon toga nijednom tinejdžeru nije pošlo isto za rukom sve do pojave talenta iz Crne Gore.
Viktor Đukanović je nastavio sa fenomelanim partijama u dresu Hamarbija, sinoć je na meču Sirijusom (2:2) postigao deseti gol u šampionatu Švedske ove sezone, a kako piše “Aftonbladet” tako i postao prvi tinejdžer sa dvocifrenim brojem pogodaka u prvenstvu još od momka sa početka priče i današnje zvijezde Njukasla.
Mladi Nikšićanin (19), koji je u januaru iz Budućnosti prešao u Hamarbi, nalazi se u vrhu liste strijelaca Alsvenskan lige, a ispred njega su samo četvorica fudbalera, koji mu ne bježe mnogo – najbolji trenutno je iskusni napadač Malmea Isak Kise Telin sa 14 golova. Beni Traore iz Hakena 12 puta je tresao mrežu, a Danac Jeke Okels (Elfsborg) i Sebastijan Nanasi (Malme) po 11.
