U sjedištu UEFA-e u Nionu, jutros je odžan žrijeb kvalifikacionih grupa za Evropsko prvenstvo mladih fudbalskih reprezentacija.
foto: Uefa.comNaša mlada reprezentacija saznala je danas imena svojih protivnika u novom ciklusu kvalifikacija za EP, koje se igra u Poljskoj 2017. godine.
Crna Gora će se za plasman na šampionat Starog kontinenta boriti u grupi 1, sa Češkom, Belgijom, Moldavijom, Letonijom i Maltom.
Prvo kolo kvalifikacija će biti na rasporedu od 23. do 31. marta 2015. i ciklus će trajati sve do 11. oktobra naredne godine. Pobjednici svih devet grupa plasiraće se na Evropsko prvenstvo, gdje ih već čeka domaćin Poljska, dok će četiri najuspješnije drugoplasirane ekipe igrati baraž za ostala dva mjesta na završnom turniru.
“Naša selekcija je iz prvog šešira “upecala” selekciju Češke redovnog učesnika završnica ovog takmičenja i domaćina ovogodišnjeg finalnog turnira. Samo jednom u posljednjih pet ciklusa Česi nisu uspjeli da se domognu makar baraža za EP, a najbolji rezultat ostvarili su 2011. godine kada su na Evropskom prvenstvu u Danskoj osvojili treće mjesto.
Pored Češke, velikog rivala u borbi za prva dva mjesta naša selekcija će imati u Belgiji. Iako su žrijebani iz drugog šešira, Belgijanci nemaju velikih uspjeha u ovom uzrastu – od polufinala koje je 2007. godine izborila generacija predvođena Felainijem, Vicelom i Vertongenom, danas nosiocima igre seniorskog nacionalnog tima, Belgija nije uspjela da se plasira na završni turnir.
Moldavija je bila prijatno iznenađenje prošlogodišnjih kvalifikacija kada ima je drugo mjesto izmaklo zbog lošije gol razlike u konkurenciji Engleske, Finske i Velsa, dok Letonija i Malta u posljednjem ciklusu kvalifikacija nisu uspjele da upišu pobjedu”, piše o našim rivalima na sajtu FSCG.
Reprezentacije koje izbore baraž će svoje mečeve odigrati 7. i 15. novembra 2016., kada će biti poznati i posljednji putnici na Evropsko prvenstvo u Poljskoj.
Grupa 1: Češka, Belgija, CRNA GORA, Moldavija, Letonija, Malta
Grupa 2: Italija, Srbija, Slovenija, Republika Irska, Litvanija, Andora
Grupa 3: Francuska, Ukrajina, Škotska, Island, Makedonija, Sjeverna Irska
Grupa 4: Portugal, Izrael, Grčka, Mađarska, Albanija, Lihtenštajn
Grupa 5: Danska, Rumunija, Jermenija, Vels, Bugarska, Luksemburg
Grupa 6: Španija, Švedska, Hrvatska, Gruzija, Estonija, San Marino
Grupa 7: Njemačka, Rusija, Austrija, Finska, Azerbejdžan, Farska Ostrva
Grupa 8: Holandija, Slovačka, Turska, Bjelorusija, Kipar
Grupa 9: Engleska, Švajcarska, Norveška, Bosna i Hercegovina, Kazahstan
