Startovala je francuska “Liga 2”, a odličan početak imao je golman crnogorske reprezentacije Danijel Petković.
Prvi čuvar mreže Lorijena imao je čak osam odbrana u remiju protiv Avra kod kuće (0:0). Iako su gosti imali veliki broj prilika, Lorijen je bio bliži pobjedi, jer je napadač Visa promašio penal krajem prvog poluvremena.
“Zadovoljan sam startom, iako mi je žao što nismo pobijedili. Mogli smo, barem 1:0, jer smo imali penal. Ipak, idemo dalje, tek je početak, a Avr je mnogo jak tim, prošle sezone je igrao baraž za ulazak u elitu i ozbiljan je kandidat i ove sezone”, kazao je Petković.
“Oslići” sa Petkovićem ciljaju ulazak u elitini francuski rang. Nisu uspjeli prošle sezone, iako su bili na dobrom putu – sjajno su počeli sezonu, ali ih je koštao pad u drugom dijelu. Na kraju nisu izborili baraž za doigravanje, a novi prvoligaši postali su Rems i Nim.
Petković je stigao u Lorijen ljeta prošle godine i odmah je postao standardan – prve sezone upisao je 33 nastupa.
Prije toga je branio za MTK Budimpeštu, Bokelj, Zetu i Lovćen.
Za reprezentaciju Crne Gore upisao je devet nastupa.
