Košarkaši Sutjeske dobili su derbi petog kola ABA2 lige – izabranici Zorana Glomazića porazili su na svom terenu MZT iz Skoplja 85:70 (18:20, 23:13, 19:21, 25:16), i nanijeli prvi poraz makedonskom timu.
Sutjeska je sada izjednačena sa Skopljancima na skoru 4-1, a po četiri pobjede i poraz imaju Borac i Široki, koji je juče porazio Lovćen.
Iako je domaćin vodio 9:2 i 17:12, MZT je dobio prvu četvrtinu i vodio je u prva tri minuta druge dionice, posljednji put sa 24:23.
Sutjeska je onda serijom 9:0 preokrenula na 32:24, i vođstvo više nije ispuštala do kraja meča. Domaćin je sredinom treće četvrtine poveo 16 razlike, posljednji put na 51:35, ali je MZT početkom posljednje četvrtine smanjio zaostatak na četiri poena (60:56).
Utakmica je riješena nešto više od tri minuta prije kraja, kada je Sutjeska kompletirala seriju od 9:0 za nedostižnih 76:61…
Nikšićane je do pobjede predvodio Nikola Pavlićević sa 21 poenom i pet asistencija, pratio ga je Draško Knežević sa 17 poena i osam asistencija. Dvocifreni su bili i Miloš Vujović (14) i Ismet Sejfić (10), koji je imao i sedam skokova. Marko Ćalić je bio najbolji skakač u domaćem timu sa 10 uhvaćenih lopti.
Kod MZT-a najbolji je bio Džabari Hajnds sa 22 poena, Damjan Stojanovski je dodao 13 poena.
Sutjeska u sljedećem kolu, 7. novembra, gostuje Borcu.
