Iako je protivnicu pošteno namučila u prvom setu, Danka Kovinić nije uspjela da se plasira u drugo kolo Rolan Garosa – od nje je danas bila bolja osam godina starija Belgijanka Kirsten Flipkens sa 7:6 (8-6), 6:2, za 97 minuta igre.
Imala je Kovinićka priliku da osvoji prvi set, jer je vodila 6:5, ali je neiskustvo uzelo danas, pa je najbolja crnogorska teniserka izgubila tri poena u nizu, samim tim i set.
Belgijanka je, inače, bolje počela meč, povela je 3:0, potom i 4:1 u prvom setu. Ipak, Danka je prvo smanjila na 2:4, potom je iskoristila brejk loptu za 3:4, a onda je na svoj servis i stigla do izjednačenja.
Do 6:6 su obje teniserke sačuvale svoj servis, pa se igrao taj-brek. Flipkens je povela 4:1, ali je Kovinić preokrenula na 6:5 i stigla do set lopte, koju, međutim, nije iskoristila.
Flipkens je odmah na startu drugog setu napravila brejk za 1:0, Danka nije iskoristila svoju brejk šansu kod 1:2 u gemovima. Belgijanka je novi brejk napravila u sedmog gemu, povela 5:2 i otklonila sve dileme…
Kirsten, koja je 21. nosilac na Rolan Garosu, u drugom kolu igraće protiv Izraelke Julije Gluško, koja je na startu bila bolja od Hrvatice Done Vekić 2:1 (7:5, 2:6, 6:4).
Kovinić, 106. na rang listi, plasmanom u glavni žrijeb drugog ovogodišnjeg Grend slem turnira ostarila je najveći uspjeh u karijeri.
U kvalifikacijama je Danka bila bolja od Francuskinje Stefani Fiorec-Gakon, Hrvatice Ane Konjuh i Čehinje Tereze Smitkove.
Vijesti
