Dileme nema – u narednoj sezoni Košarkaški klub Budućnost će biti na francuski pogon. Nakon Aksela Buteja plavo-bijeli dres zadužio je Džeri Frenk Butsijel.
U drugom dijelu prošle sezone 32-godišnji francuski centar nosio je dres Dubaija sa kojim je igrao polufinale ABA lige.
Odbrana je zaštitni znak 207 centimetara visokog Butsijela, a kao igrač Bahčešehira u sezoni 2022/23 izabran je u idealnu defanzivnu petorku FIBA Lige šampiona.
Karijeru je, logično, počeo u domovini. Prije svega u Ruanu, a nakon toga nastupao je za Šole i Limož, prije nego što ga je angažovao Monako, sa kojim je igrao i Evroligu.
Nakon epizode u Kneževini, diže sidro i seli se u Tursku. Prvo u Bahčešehir gdje je bilježio 14,6 poena i uz 8,2 skoka po meču. Nakon epizode u Bahčešehiru uslijedila je selidba u Pinjar Karšijaku odakle se u drugom dijelu prošle sezone preselio u Dubai.
U ABA ligi je prosječno bilježio devet poena uz 5,2 skoka po meču.
“Riječ je o efikasnom post igraču sa sjajnim procentima. Odličan je u skoku – podjednako na obije strane terena. Kombinacija snage i agilnosti krasi ga kroz cijelu karijeru. Idealan je za timove u kojima centar ima jasnu, finišersku ulogu i gdje se traži fizička prisutnost u reketu“, stoji u saopštenju Budućnosti.
Butsijel je treće pojačanje vicešampiona regionalnog takmičenja za narednu sezonu. Prethodno su stigli već spomenuti Butej i ukrajinski plejmejker Aleksandar Kovlijar. Takođe, ugovore su produžili Džuvan Morgan i Jogi Ferel.
